車來車往嘅觀塘繞道噚日出現白衣婦人「慢步」奇景，朝早10點幾，杜先生坐同事車由觀塘去九龍灣，點知過咗觀塘碼頭開始塞車，就喺呢個時候竟然有個白衣婦迎面而來，沿住慢線旁邊嘅路肩而行。
搭巴士落錯車迷路
「個女人着住白色衫，攞住個手抽袋，迎面而來好悠閒。」杜先生話因為塞車，架架車都停低，「如果平時架架車高速行駛，好戥佢安全擔心」。佢仲話，觀塘繞道係高速公路，唔明點會有人行。究竟係行錯路，定係將繞道當捷徑，甚至最後是否安全離開，佢都滿腦問號。
警方話接到報案，喺觀繞搵到一個72歲婆婆，阿婆解釋因為搭巴士落錯站迷路，打算行番屋企，唔知點解行咗上繞道，之後阿Sir通知家人接佢返屋企。