英超球隊曼聯周二晚舉行佢哋一年一度嘅頒獎禮，球員們個個着到靚靚仔仔，拖住養眼嘅另一半赴會。而頒獎禮嘅大贏家，就非門將迪基亞莫屬，首先佢獲得由各個紅魔球員選出嘅年度最佳球員，其後仲破紀錄咁第四次獲得球迷票選嘅年度最佳球員獎，可謂威盡全場。
四奪最佳破C朗紀錄
2011年由馬德里體育會加盟曼聯嘅迪基亞，喺超過107,000張球迷選票入面，獲得超過三分之二嘅選票成為票王，輕鬆擊敗得票10%嘅連格再次成為曼聯年度最佳球員，而表現受到批評嘅盧卡古都有8%嘅選票支持排第三。迪基亞就話自己好難用言語表達曼聯對佢嘅意義，「我以前冇諗過自己可以贏，但我已經第四次拎到呢個獎，對我嚟講真係好正！」
迪基亞今季為紅魔喺英超踢足，35場聯賽全部正選出場，當中有17場保持清白之身，多次喺關鍵時間拯救曼聯，難怪香港球迷都流傳一句「要不是迪基亞照顧你們曼聯，完蛋了！」可見呢位27歲嘅西班牙門將對紅魔重要性。佢亦繼14至16年三連霸後，再次獲球迷票選為曼聯年度最佳球員，打破咗基斯坦奴朗拿度（C朗）三度當選嘅紀錄。
迪基亞雖然威盡全場，不過就好似得唔到摩連奴嘅歡心，事關呢位曼聯領隊所揀嘅年度最佳球員係佢一手扶植嘅麥湯米尼。摩佬都有解釋佢點解揀呢位21歲嘅年輕中場，原因都好感性吓，「每個男仔嚟到球會，夢想都係為一隊比賽，之後就係想踢重要嘅比賽同歐聯，最終當然係入選國家隊。麥湯米尼喺過去五、六個月所有嘢做齊晒，所以揀佢為我嘅年度最佳球員。」
卡域克獲特別貢獻獎
頒獎禮都有感人一幕，季後退休嘅卡域克獲頒特別貢獻獎，表揚佢曾經為曼聯立下嘅汗馬功勞。過去呢位英格蘭中場為曼聯喺英超上陣超過300場，掛靴之後將會加入教練團隊，所以摩佬特別送上一件已經印有佢姓氏同名第一個字嘅教練團制服，仲送咗個哨子畀佢，未來可以命令一眾前隊友。而摩佬都發表咗一段好感性嘅演辭：「一位偉大嘅球員要離開，但一個重要嘅人物留低咗。」