喺5.1黃金周長假期間，大批內地旅客來港度假，連西貢都俾內地遊客逼爆，有網民投訴坐16座小巴入西貢，驚見車上載有22名乘客，連通道都塞滿乘客，鬧爆司機罔顧乘客安全。
網民拍嗰條片只有短短幾秒，但片中清晰可見，車上除咗坐滿乘客，連通道亦有5名乘客坐喺地，連司機位置旁都有個乘客縮埋坐，連同車上16名乘客加司機，成23人塞喺車。之前有保險業界已警告過，假如交通工具超載發生意外，保險公司唔會作出任何賠償，即係話坐超載車嘅乘客係好冇保障！有網民話司機大佬靠害咩？萬一有意外，超載保險係唔賠！亦有網民感嘆，旅客搞到好似難民、偷運人蛇咁款，何苦呢？
