噚日勞工及福利局局長羅致光（CK）開「地圖炮」，發言時拎住數據一次過批晒民主、建制、甚至立法會秘書處研究部話政府投入安老資源唔夠，羅致光一向有「神童」之稱，有民主黨人話佢以前最叻用數據駁人，不過佢原來噚日發言未算辣，佢仲度緊更辣嘅嘢批評班議員。
《蘋果》攝記噚日開立會期間，影到羅致光用緊iPad打緊文章，咁八方睇佢寫乜，原來佢寫緊議員問嘅預算案書面問題，有人年年問2013年先導計劃資料；有人問2018年未開始嘅先導計劃資料；有人直情照抄上年問題又唔改年份；仲有人將問題問完又問。羅致光揭完議員蝦碌嘢，仲抽水話議員錯失向政府提問機會，但佢咁揭議員瘀事，等同挑機，怕且又會辣㷫好多議員。