「十幾人衝出嚟打對方5、6個，有人嗌『自己人呀』都照打，仲有人被打到瞓咗喺地」，三更夜半嘅粉嶺華明邨休憩公園變成格鬥擂台！住喺康明樓嘅Kenny噚日凌晨2點番屋企，佢話見到樓下企咗5、6個𡃁仔已經覺得唔對路，點知隔無耐就走咗十幾人出嚟追住班𡃁仔打，拳腳冇眼，有人被打到瞓低，其他人繼續係咁打。
呢場街頭擂台打咗幾分鐘，Kenny話：「俾人打嘅十零歲至21、22歲，打人嘅就好狼，5、6個圍住一個係咁打。」拳腳交加之際，有兩個被打到瞓咗喺地完全唔郁，好似傷得好嚴重。
呢場交搞到好多街坊無覺好瞓仲報埋警，阿Sir話噚日凌晨2點幾接報有人喺華明邨康明樓對開公園仔打交，警察到場發現6人受傷，佢哋話傾偈時遇襲，原因不明。