經民聯金融服務界議員張華峰「肥老闆」噚日66歲牛一，一眾經民聯議員買咗蛋糕同佢慶生。肥老闆話今年生日願望係希望港交所（388）可以升到$388高位！
每年生日，經民聯黨友都會同肥老闆慶祝，林健鋒、盧偉國、劉業強、梁君彥都有現身。不過上年獻吻嘅梁美芬就冇出席，林健鋒就解釋佢哋唔係重男輕女，而係美芬議員有會開，叫大家唔好誤會。
講到生日願望，肥老闆就話希望身體健康、經民聯越做越好，當然亦都希望股票大升，388可以升到去目標價$388喇，噚日388收市升咗兩蚊，雖然升唔夠1%，但跌市下有得升算係一份小生日禮物！
至於老婆峰嫂送咗咩生日禮物，肥老闆就話老婆日日都送咁多禮物，仲大爆金句話老婆唔係「峰嫂」，係「風騷」㖭！