德乙球隊聖保利嘅日本翼鋒宮市亮養傷近一年，日前喺預備組復出13分鐘又再傷過，呢位日本前國腳可能第三次膝部十字韌帶撕裂，職業生涯亮起警號。25歲嘅宮市亮2011年以高中生身份加盟英超球會阿仙奴，成為日本極少數未打過本地球會就外流嘅球員。宮市亮跑得又扭得，初出道就有「日版C朗」嘅稱號。可惜佢喺英超嘅發展唔係咁順利，2015年約滿後，就轉投德乙聖保利。但係宮市亮加盟聖保利僅一個月左右，就喺練習中整親左膝十字韌帶，唞一輪之後，到上年六月又到右膝十字韌帶撕裂。休養11個月之後復出，點知又再次觸傷左膝十字韌帶。唔少日本球迷都認為，宮市亮三年內三度重傷，好難重上高𥧌，可唔可以繼續球員生涯都成問題。