華將何澤堯的大靠山係邊個？梗係練馬師呂健威啦。季內何澤堯取得14場頭馬，其中超過一半的八Win由呂健威供應，另有15次二、三名攜手入位紀錄，如果冇咗呂健威力撐，堯仔都幾頭痕。
今朝(1日)這對拍檔在沙田馬場又有異動，呂健威在烽火台附近捉實何澤堯咬耳仔，講解周三(2日)泥地夜馬出擊戰略，須知今季兩人每逢出現這鏡頭，在緊接的賽事多數都能搏殺得手。
今期呂健威有「精算齊同」及「陽明豐豐」一對馬交予何澤堯操刀，其中第六場四班泥地1650米的「陽明豐豐」最值得留意，上仗田草1000米輸得唔太遠，質新馬漸到位，父親BATTLE PAINT為泥地賽阿聯酋打吡冠軍，所以「陽明豐豐」今次初跑泥地非無的放矢，隨時成為呂健威、何澤堯另一合作頭馬。