老前輩一個比一個犀利，真是不由你不服，楚原的金像獎演講掌聲不斷，無非因為棒打方小姐催生Me Too效應，曾經被欺凌的受害人一呼百諾，積埋積埋幾十年的怨氣齊齊釋放，以致蔚為奇觀，論道理，其實接近老生常談，患有家長恐懼症的超齡廢青還要為洪鐘聲線深感不適，如果不是近年市面歪理氾濫，大家難得聽到一句人話，得分應該不會如此高；我更欽佩的是倪匡，有人大筆一揮將衛斯理搬進映象世界，據說貌離神也離，存心搞事的記者於是詢問原著作者意見，誰不知他滋油淡定答：「導演根據小說拍一部戲，邊有可能嘅事，當然一定要改編，唔係要編劇導演嚟做乜？我最反對『忠於原著』四個字，乜叫改編啫？攞任何小說改編都冇可能忠於原著。」嘩，呢期不是流行「厲害了，我的X」嗎，照我睇，倪先生不但在他隸屬的界別遙遙領先，就算放諸三山五嶽亦必定獨佔鰲頭。
這種四両撥千斤的功力，普通人恨都恨唔到，假若當年李安練得此門絕技，那些手執《色，戒》指指點點的真假張迷只好統統落荒而逃，平日再牙尖嘴利，也唯有擘大口得個窿。金句陸續有來：「睇書唔失望咪得，電影失唔失望同我冇關係」，「唔到我畀意見，人哋拍戲人哋事，唔係我嘅事」，「我冇興趣睇，有興趣都唔得閒」，句句乾淨利落，示範何謂見血封喉。但倪先生舉《老貓》做例子，說「貓同狗打交拍唔到，一定要改㗎嘛」，卻恕我不同意，他大概忙於養尊處優，很久沒有進過電影院，不知道現代技術已經去到無所不能境界，自己打自己都拍得入肉三分哩。