建制派最近因為瘋狂狙擊捲入搶手機風波嘅白鴿黨立法會議員許智峯，激起唔少網民睇唔過眼，大翻建制派舊賬，認為如果要譴責許智峯，一班建制派議員應該被譴責咗先，例如喺立法會調查689 UGL事件時，涉嫌私通689嘅民記議員周浩鼎、至今學歷唔清唔楚嘅民記立法會議員葛珮帆同柯創盛等，噚日何君堯現身港台英文節目，亦俾台下觀眾翻佢舊賬，問佢當日講對主張港獨人士「殺無赦」，係咪想殺死所有民主派？
「殺人從不是我選擇」
八方估何君堯諗唔到有觀眾咁問，第一時間叫個觀眾應該check清楚先，不過同何君堯同台嘅行會成員湯家驊聽到，就忍唔住抽水，笑稱以為何君堯係想殺死戴耀廷！何君堯聽到當然即場否認，連講四次「No」後話:「Killing is not right, especially as a lawyer, I never say that. Killing is not my option at all.（殺人是不對的，尤其作為律師，我從來沒說過，殺人從不是我的選擇）」又話倡議港獨的人，先會令好多人喪命喎。
同場嘅白鴿黨靚女大狀吳思諾，除咗英文流利，表現亦非常淡定，一度要求何君堯交代，點解香港眾志羅冠聰以前可以做議員，𠵱家政府卻連周庭參選都唔畀，何君堯聽到，只話以前政府准許做的嘢，唔代表𠵱家有權去做喎。
李八方