巴塞隆拿星期日喺聯賽大勝拉科魯尼亞4:2，提早四輪鎖定今季西甲冠軍，連埋西班牙盃冠軍，巴塞就喺禮拜一舉行勝利巡遊，數以萬計嘅巴塞球迷湧上街一齊慶祝，並且送別早前宣佈季尾離隊嘅隊長恩尼斯達。
今次已經係小白第九次幫巴塞喺西甲登頂，亦都係佢以巴塞球員身份攞嘅第32個冠軍，小白呢日就收起感性一面，同班隊友盡情慶祝冇再眼濕濕，唔知下季佢喺新東家仲有冇機會參加呢類巡遊呢？巴塞剩番四場聯賽，要睇小白嘅球迷，千祈唔好錯過喇！
慶功T冇名 迪路菲奧嬲豬
不過球隊奪冠就似乎唔係個個球員都咁開心，季中以借用形式轉投英超屈福特嘅迪路菲奧，日前就喺社交網站上載咗佢上半季喺巴塞嗰陣嘅比賽相同埋巴塞慶功Tee嘅相，睇真啲原來件T恤只係印咗23位球員同教練華維迪個名，季中離隊嘅迪路菲奧、馬斯真蘭奴同阿達杜倫都冇份。
迪路菲奧上半季喺巴塞都幫球隊喺西甲上陣過10次，射入過一球同交出兩次助攻，假假哋冇功都有勞，難怪佢都要貼文發洩吓：「今屆西甲冠軍我都有一半份㗎，唔係咩？」唔知巴塞係睇到迪路菲奧嘅貼文定係受到網民嘅壓力，喺勝利巡遊之前就趕製咗新一批慶功Tee，印番晒幾個離隊球員嘅名上去，可以見到球員喺巡遊着嗰件衫背脊嘅名單都長咗，巴塞今次知錯即改都算係咁喇！
皇馬打吡戰拒列隊
巴塞雖然今季爭冠嘅任務已經完成，不過下星期日仲有場主場對皇家馬德里嘅西甲國家打吡要踢，肯定要為面子而拼搏。皇馬教練施丹一早表明，由於巴塞喺首循環嘅對碰冇列隊歡迎當時贏咗世冠盃嘅皇馬，所以皇馬今場都唔會列隊歡迎宿敵咁話。
巴塞當時就解釋，球隊唔會向自己冇份踢嘅比賽冠軍球隊致敬，而呢場邊個要向對手列隊嘅牙骹戰，就有佐迪艾巴加入：「如果換轉係我哋嘅話，一定會列隊向對手致敬，我哋之前都試過喺巴拿比奴列隊歡迎皇馬，不過我知道皇馬高層肯定唔想同我哋致敬。」睇嚟呢場「列隊風波」又會為今場西甲大戰增添幾分火藥味喇。