蟒蛇喺香港郊區不時出現，不過唔係個個人都可以親眼見證佢哋鯨吞獵物嘅場面，好似讀者阿恆前晚經過清水灣碧水新村行人路，就見到一隻半米長嘅果子狸攤喺路邊，身上俾一條大約兩米幾長嘅蟒蛇纏住，反晒白眼，仲吐到成地血，場面驚嚇，搞到大批村民走出嚟圍觀。
村民圍觀 嚇窒蛇女
成班村民除咗圍觀食花生外，仲對條蛇評頭品足，有人見到條蛇剩係纏住果子狸冇進一步動作，就話：「佢都唔食，冇晒胃口啦！」隨即引來另一名街坊搭嗲：「咁多人，佢𠵱家諗緊點撇呀！」亦有一名街坊話當年，聲稱30年前見到一條大蟒蛇喺屋企對開大坑渠出現過，估唔到𠵱家又見到。
大蟒蛇唔知係咪怕醜，最終冇喺眾人面前開餐，其後蛇王何到場用布袋吸引佢嘅視線，輕易活捉佢，檢查過條蟒蛇後，話係條緬甸蟒蛇女，4到5歲左右，估計果子狸喺叢林搵食嗰陣俾佢睇中，糾纏之下碌出馬路，果子狸最後被勒死，但係蛇王何認為村民走近圍觀令蛇女受驚，否則就會生吞隻果子狸。
記者問過獸醫黎昌生，佢話夏季係蟒蛇活躍季節，通常佢哋好有耐性活捉一啲體形大過自己嘅哺乳類動物，包括果子狸，食完都可以消化成個月先再搵食，而且蟒蛇細個會受鵰、麻鷹或貓頭鷹等猛禽威脅外，成長後就冇天敵，有啲仲可以活到三、四十歲以上，所以有街坊話幾十年前見過佢一啲都唔出奇。緬甸蟒係世界上最巨型嘅6種蛇類之一，喺亞洲算係屬於第二大蛇，主要棲息喺近水地方同樹上，同屬於夜行性動物嘅果子狸一樣，都係受《野生動物保護條例》保護，所以大家千祈唔好捉。
