不時都有金句嘅新民黨容海恩Eunice，真係冇令大家失望。話說早兩日Eunice接受一個電視節目訪問嘅時候爆出，「我覺得議會內外都唔應該牽涉太多政治」，即時引起網民狂插。
網民熱改 「唔應該牽涉」成例句
網民順水推舟，套用喺日常嘅情況當中，例如話餐廳內外唔應該牽涉食物、學校內外唔應該牽涉太多學習，甚至辦公室內外唔應該牽涉太多工作等。換轉係其他政界人物，不外乎潛水或者出嚟死撐，但只有Eunice會咁樣回應。
經過兩日嘅發酵，Eunice佢一啲都冇嬲，反而用番幅金句圖嚟自嘲。佢喺fb出po話「少講政治，講刑事」，因為「講唔講政治都好，刑事問題一定要正視，許智峯強搶手機，不論政治還是刑事層面，都應該予以嚴厲譴責」。然後順道呼籲大家參加佢搞嘅支持譴責許智峯聯署。
許智峯件事呢就好似有警方查緊㗎喇，告定唔告警方自有決定，Eunice再搞聯署係政治定刑事，大家自有判斷。不過呢鋪佢好似食咗誠實豆沙包咁認番自己句金句，仲用番金句嚟自抽，都算係有啲新意啦。