香港人生活節奏急促，又有幾多人會細心觀察日日經過嘅地鐵站有乜細微變化？巿民Eddie就唔同嘞，佢上禮拜六喺港鐵香港大學站B2出口搭扶手電梯嗰陣，發現大堂石牆驚現「人樣」，佢影相po上fb分享，仲話：「Big boss is watching you!」引嚟好多討論，有人好似搵到知音人咁話之前已經見到：「我以為得我一個覺得似㖭！」
有人講笑話「有鬼」，心水清嘅網友仲諗番起30幾年前哄動一時嘅溫莎公爵大廈（即係𠵱家嘅皇室堡）「狐仙」傳說。呢個時候有人兩個字就篤穿𠵱個無限幻想：「滲水！」港鐵發言人亦都證實咗係水印嚟嘅箒，稍後會搵清潔工處理，唔會影響車站結構安全嘅。之後港鐵仲搵張改善工程通告遮住個「人樣」。提番大家，2015年4月西港島綫通車唔夠4個月，香港大學站都試過地下水滲漏，漏水最嚴重嘅正正就係B出口。