你有壓力，我都有壓力！港鐵沙田站地下大堂就上演一場大叔MMA，話說前日下晝一點幾，讀者曾先生見一個白髮平頭裝個阿伯拖住手推車出閘時，後面黑髮大叔嫌人哋慢，「叫佢行快啲！」於是雙方嘈起上嚟，之後演變成拳賽。
片中所見，雙方好似自由搏擊咁拳來腳往，黑髮大叔就最有衝勁，好幾次上前追打，但阿伯都守得住，採取穩守突擊戰術，待黑髮大叔一拳打空，就一嘢箍住佢條頸，呢個時候黑髮大叔失咗平衡仆低，阿伯就順勢將佢壓落地，等黑髮大叔無得反抗。
拳賽勝負已分後，有巿民走去做和事老勸交同分開佢哋，平頭裝阿伯一度呼冤：「係佢郁手打我先呀！」警方話，警員到場向兩名涉事67歲姓余及65歲姓陸男子問話，雙方表示願意和解，自行離去，警方列糾紛處理。