網上熱傳一段喺前日拍攝嘅車Cam片，片中至少三部辣車出場，包括淺藍色寶馬335i辣跑同日產GT-R。3車由金鐘起步，逢車過車，再往石澳方向飛馳，視雙白線如無物，橫cut直切，有時入彎仲逆線而行，睇到人心都離埋！
周日清晨3架辣跑由灣仔警察總部外起步，沿紅棉路直達赤柱峽道，全程13公里，只需9分鐘，平均時速達87公里，較正常行車時間20分鐘少一半以上。片段可見對頭車或被爬頭車輛包括有閃燈救護車、專線小巴同的士，最危險一幕係一直領前嘅淺藍色寶馬喺淺水灣附近，突然加速切雙白線逆線爬頭，前面嘅私家車驚到即刻收慢車速避開。《蘋果》搵到寶馬嘅車主，但佢話：「我唔知喎，當時架車唔喺我手上，擺咗喺人哋度。（邊個人哋？）擺咗喺車房，其他嘢我唔係咁方便透露。」警方港島總區交通調查組正跟進調查。
