上周五政圈好熱鬧，因為新民黨同公民黨都分別舉行黨慶，唔少政界中人兩邊走，適逢當日財委會要審批有關西九嘅撥款，政府中人驚開會人數不足流會係好正常，但唔等於可以為咗箍票可以亂咁嚟，好似民政局政助黎穎瑜為咗掌握議員去向，竟然向公民黨機師譚文豪索取黨慶流程，唔通佢當咗譚文豪都係狗仔隊，要協助佢數票？
為數票掌握議員去向
譚文豪噚日同八方講起呢件事，依然好㷫。佢話黨慶當晚收到黎穎瑜來電，要求佢提供黨慶流程，以便掌握公民黨議員以至獲邀出席黨慶嘅其他民主派及建制派議員去向，以便進行數票工作。譚文豪當然一口say no，佢話已經向對方指有關做法極唔尊重公民黨，強調：「我唔會協助你做狗仔隊！」反問黎：「你憑乜資格問我攞（流程）？」
點解事隔幾日先公開？原來係因為政務司司長張建宗，因為張建宗日前指狗仔隊只係低調地觀察議員，唔會干擾、騷擾議員，但黎嘅做法明顯唔係咁啦！雖然唔知黎穎瑜此舉係佢上級意思、定係自把自為，但譚文豪已經決定寫信向張建宗投訴。
黎穎瑜回覆八方指，坦承曾致電譚文豪了解公民黨黨慶時間流程，「但只係問幾時開始等時間問題，絕對唔存在問個別黨派、議員或者人士嘅行蹤，完全唔存在監控情況。」
其實黎穎瑜唔係第一次做惹火行為，今年初佢就被指為咗提醒建制派準時開會同投票，無啦啦開咗個短信群組加入晒全部建制派，激親建制派，估唔到轉個頭得罪埋民主派。
李八方