灣仔金紫荊廣場上演「武林大會」拳拳到肉，警方要介入拉人，立法會旅遊界議員謝姚思榮話金紫荊係旅遊熱點，今次涉及影相檔職員同旅客打交，擔心有損香港形象，佢話金紫荊廣場對開嘅影相檔係無牌經營，過去亦接過有關投訴，希望檔商自律檢點，否則當局就會採取掃蕩行動打擊。
佢話現時除咗尖東海旁嘅影相檔有發牌之外，其餘金紫荊廣場對開空地同山頂太平山獅子亭，都係無牌或者由嗰度啲業主管理。以金紫荊廣場為例，會展亦有豎起警告牌，寫明「禁止在金紫荊廣場範圍內擺放攤檔或展示貨品」。其實呢類影相檔收費唔算貴，亦方便遊客同景點合照即影即有。
不過有導遊話，金紫荊廣場外嘅影相檔競爭好激烈，有相熟導遊仲會特登帶團嚟幫襯，引起其他檔商眼紅而有紛爭，但搞到同內地旅客大打出手就好少見。