大賽日過後，今次周三（5月2日）夜馬安排玩泥沙，認真係燦爛過後歸於平淡！
泥地賽好唔好睇？好唔好玩？馬迷又受唔受落？唔同人有唔同見解，真係見仁見智，不過睇成績，就出現咗一類盲門馬房，今季跑到季尾，依然於泥地賽事未贏過馬，而最出奇嘅，其中一位竟然係大師級練者告東尼。
告仔昨午（29日）憑「巴基之星」又贏大賽，更於女皇盃包辦連贏，威風八面，不過講到泥地賽成績，東廐今季就差強人意，暫時在只取得三亞三季，上名率僅得15%，而東廐最近一匹泥地頭馬，更要數到去年5月底獲勝的「勁精神」，表現之差，的確與草地有天淵之別。
禮拜三晚東廐有四駒列陣。其中，季內曾於泥賽入位的「巴基小子」將起用有十磅可減的新起孖見習騎師黃俊執韁，兼且打王牌報名，加上同主「巴基之星」新勝女皇盃，幕後氣勢如虹，看來前駒必屬馬房今戰主力所在。
另外，兩位本季仍未在泥地取勝的練馬師姚本輝與李易達，周三晚分別以五駒及三駒應戰，且看能否打破悶局，尤其是後者現時尚未達標，為前途而戰，更肯定必拼無疑。