一雙巧手，唔只可以係縫紉奇才，亦可能係外科聖手，少女時代許曉暉（Florence），係咁樣認為。2008年加入特區政府做副局長前，喺銀行界任高層，但今年44歲嘅佢自爆志願其實係想做外科醫生，「因為我讀理科，做實驗時劏過兔仔、老鼠等，都幾整齊，『手術』做得幾好，覺得應該有呢方面天份，哈哈。」
巧手亦擅長做戲服
最後佢喺中大工管以一級榮譽畢業，及後攞到獎學金去劍橋讀碩士，點解放棄做醫生？「因為屋企做生意，想我讀商科，所以我冇揀讀醫。都唔開心咗幾個月㗎，後來諗通咗，除咗醫人嘅醫生，仲有醫企業、醫社會嘅醫生，呢啲我都有興趣嘅。」
喺張祝珊英文中學讀書時，Florence做過校刊編輯，亦有參演話劇，而且台前幕後集一身，例如製作過自己有份飾演嘅慈禧太后服飾，「拿破崙帽我都整過㗎」。雖然不時參與課外活動，但Florence嘅學業成績當然無受影響，仲攞到尤德獎學金放洋留學，並喺圖書館認識咗當時喺劍橋讀緊博士嘅翟普、即係佢老公，兩人育有兩女，去年離開熱廚房嘅Florence現時都做唔少社會事務，換個身份繼續服務。