香港報業公會噚日舉行頒獎禮，特首林鄭月娥出席致辭時不忘自我誇讚，除咗話會維護新聞同言論自由，又話媒體嘅中立報道有效監察政府施政，自爆每日花45分鐘睇9份報紙，叫傳媒繼續努力，因為傳媒嘅報道係佢施政嘅動力？
話傳媒報道係施政動力
林鄭上任後確實喺傳媒採訪上有新安排，例如放寬網媒可以採訪政府記者會，佢都有喺致辭時自行畀like，又話政府重視新聞同言論自由，維護香港核心價值，繼而數白欖話已經做過80幾次記者會、30幾次本地同海內外傳媒專訪，更指會繼續要求官員同警方喺採訪同遊行示威活動方便傳媒工作，強調發展經濟、改善民生以至喺政治上有更好發展，都要依靠傳媒嘅公正同深入報道喎。至於香港新聞自由嘅國際評級降呢，林鄭就叫新聞界唔好妄自菲薄，認為香港媒體喺獨立中肯報道方面表現出色，有效監察政府工作，唔知政府「狗仔隊」嘅監察工作，喺林鄭眼中係咪同樣咁出色？