呢個世界係冇免費午餐，一切都靠自己爭取！家住將軍澳寶林邨嘅賴伯夫婦，上個星期二喺屋企差啲俾跌落嚟嘅天花石屎打中，兩老驚咗成晚第二朝報警，房署發現全屋至少7處天花要維修，兩老後來獲房署通知安排調遷，值得一讚。
79歲嘅賴伯話住咗10幾年，隔幾年就有一次天花「撲」起問題，懷疑之前3次同樓上喺花槽淋水有關，但搞到冧石屎天花就第一次，而且客廳天花亦幾乎全部拱起，佢哋擔心隨時會倒塌，賴伯話事後幾日冇覺好瞓。事後房署上門檢查，即時移除有鬆脫危險嘅石屎，但賴伯話房署要佢哋自行拆走天花燈，令佢哋好為難，求助《蘋果》。不過，上星期五賴伯接到房署通知話可以安排佢哋調遷，令佢好開心，感謝房署通融。