天水圍兩個大叔鬥豪鬥燒銀紙，查實燒銀紙喺電影裏面不時都有，最經典莫過於民間特首「發哥」周潤發主演嗰套《英雄本色》裏面Mark哥嗰一幕用銀紙點煙。
不過大律師陸偉雄話燒銀紙好似好有型、好霸氣，但隨時干犯刑事毀壞同縱火兩宗罪。佢話，喺香港焚燒港幣鈔票屬違法，因為法律上鈔票屬於發鈔銀行所有，市民只有鈔票使用權，塗污、毀壞或燒銀紙都干犯咗刑事毀壞罪，最高判囚10年。
不過燒人仔又得唔得呢？陸大狀話喺香港燒其他地方鈔票唔算犯法，但喺人來人往嘅公共屋邨公眾範圍內點火，容易波及行人，就隨時引起大火，因此可能隨時觸犯縱火罪，最高可判終身監禁！