「飛機仔」蒙迪拿今季認真慘情，事關佢喺上年11月先至俾AC米蘭炒魷，而上個禮拜六又俾新東家西維爾掃走，一季俾人炒足兩次！西維爾同時宣佈，今年62歲嘅前教頭卡柏路斯回巢，佢將會領軍直至季尾。
其實蒙迪拿上年季初仲係AC米蘭教練，雖然球會用咗超過兩億鎊買入查漢奴古、邦路斯、安達施華等球星，但戰績未有起色只喺中下游徘徊，頭14場聯賽只係贏咗六場，令佢最終喺11月被炒。而咁啱12月西維爾炒咗教練比列素，所以蒙迪拿12月就搵到新工，帶領呢支「歐霸王者」。
歐聯贏紅魔無以為繼
蒙迪拿今季嘅代表作當然係歐聯16強次回合，帶領西維爾作客以2:1擊敗曼聯，有史以來第二次殺入歐聯八強。不過西維爾之後連續九場波不勝，歐聯八強又俾拜仁慕尼黑踢出局，而上一輪聯賽作客1:2不敵下游分子利雲特，蒙迪拿執教短短四個月就被炒。西維爾喺官網發聲明話：「由於球隊近嚟戰績差劣，對上一次贏波已經係歐聯16強對曼聯嘅賽事，所以我哋決定解僱蒙迪拿。」而成段聲明亦都好唔留情面，提到蒙迪拿領軍28場只得11勝七和10負，「蒙迪拿帶領嘅西維爾喺西盃決賽大敗畀巴塞隆拿，而且更創造一個令人失望嘅紀錄，就係喺16場西甲入面，球隊只攞到19分。」
西維爾同時都公佈，由卡柏路斯接替蒙迪拿，前者喺2001年曾帶領西維爾升上西甲，喺2005年轉投拉科魯尼亞，但07年就因為成績差劣被炒。
同期意甲名宿冇個掂
西維爾主席卡斯度上個禮拜先同蒙迪拿開過會，當時仲話對方至少會留隊直至季尾：「我同佢傾咗三粒鐘。佢話畀我知，佢有信心帶領球隊攞到歐霸席位。我哋亦都對佢有信心，而以目前嘅情況，佢會留低到季尾。」但短短幾日卡斯度改變主意掃走蒙迪拿。
睇番同蒙迪拿同期嘅意甲名宿，施多夫做緊拉科魯尼亞教練，而加度素帶領緊AC米蘭。恩沙基之前亦都帶過AC，不過短短一季就離職，家吓教意乙嘅威尼斯，似乎都係踢波叻啲喎。