【馮仁昭四圍超】聞成龍速入屋吳綺莉渴望陪卓林求醫

【馮仁昭四圍超】聞成龍速入屋
吳綺莉渴望陪卓林求醫

吳綺莉個女吳卓林日前同外籍女友Andi現身加拿大一間便利店「尋父」,又拍片話自己係成龍個女,自揭有創傷後壓力症兼無家可歸,曾去過食物銀行求助。身為阿媽嘅吳綺莉一直好擔心卓林被人利用。對於卓林去年有意推出自傳,吳綺莉表明反對,佢噚日喺電話度話:「出自傳係成功或對社會有建樹嘅人士先會。其實唔好兜兜轉轉,叫嗰位老師(Andi)好好哋搵份工,唔好成日將我個女放上神枱供奉,實言聽計從㗎。」吳綺莉仲話卓林一直都好乖,自從認識Andi之後先改變:「希望佢明白我屋企冇錢,我都要好努力工作。囡囡情緒有事,我會陪佢一齊去睇醫生,請佢30歲人好好搵份工作,唔好再令我個女身體出現問題。」

吳綺莉噚日出外買滷味,未有回應記者有關卓林嘅提問。

吳卓林(右)日前喺加拿大同女友Andi拍片求助,仲自我介紹係成龍個女。資料圖片

問到有冇同成龍聯絡時,吳綺莉即刻當聽唔到匆匆入屋。

北角買滷水鵝

噚日吳綺莉揸車離開大坑寓所去北角買滷水鵝,記者問佢會唔會搵卓林,同埋卓林有冇同佢聯絡,吳綺莉只係話:「辛苦晒。」問到成龍有冇同佢聯絡,吳綺莉即刻當聽唔到咁閂門入屋,仲話自己唔會再出街,叫記者唔使再等。
撰文:馮仁昭