男人愛鬥大，最盡鬥到幾大？噚日天水圍天澤邨就有兩位大叔，真人示範「鬥燒銀紙」嚟顯示佢哋嘅英雄本色，根據讀者林先生拍到嘅片段，見到兩個60幾歲大叔喺度「鬥大認叻」，其中一個揸住罐啤酒嘅大叔，攞出一叠疑似人民幣100元鈔票出嚟，喺花槽點火焚燒。
爆料嘅林生話現場喺商場對開花圃石壆，當時有堆疑似紙幣火光熊熊，灰衫大叔左手叠人仔成吋厚，唔似假銀紙，仲好豪氣咁「大」白衫大叔：「我仲有呀！你頭先咪大我，又話我燒幾多你燒幾多？燒囉，我5,000蚊嚟講垃圾嚟！」
「白衫大叔都有燒，不過就冇燒咁多。」呢個時候灰衫大叔意猶未盡：「夠膽大我，我大到你一棟都冇，夠膽攞全部身家出嚟！」佢越講越㷫：「講笑㗎？我哋沙井仔講嘢㗎？」更話：「好似佢咁，留番200蚊壓袋，冇錢飲茶，我請你！」林生話，白衫大叔除咗用嘴巴還擊，仲幫手將未燒嘅銀紙掟番落火堆，此時灰衫大叔又抽水嘲笑：「你留番200蚊，係男人嚟㗎咩！」
有街坊指係高仿冥鈔
場火燒咗10分鐘，至少燒咗1萬蚊人仔，林生話銀紙燒完之後，兩個大叔繼續鬥嘴，佢拍完片就離開咗，「好搞笑，但係有錢都唔係攞嚟燒囉！」《蘋果》記者之後去番片段中嘅花圃，果然見到石壆有燒過黑烘，仲有燒剩嘅報紙同啤酒罐，但已經搵唔番銀紙殘骸。有街坊講，兩位大叔係兩兄弟，因拜山問題嘈交，「一個話拜，一個話唔拜!」仲話燒嘅其實係高仿100蚊人仔陰司紙，至於燒咗嘅係真銀紙定假銀紙，就只有兩位大叔自己知喇！