今季黑仔練馬師公認為賀賢，搏來搏去目前只贏得9場頭馬，亞軍次數竟高達31場，明顯手風唔順，但姑勿論如何，馬季尚餘不足三個月便煞科，頭馬不達16場就要接警告信，賀賢梗要急起直追。
幸好賀賢堂堂大倉勝在子彈多，都夠號召力，最近已有潘頓勝出「百步穿雲」及十三少韋達替「盈華盛甲」爆大冷，幫手贏番兩Win，嚟緊禮拜三晚（5月2日）沙田泥地夜賽，亦力邀到雷神莫雷拉幫拖救亡，對馬房來說算係打下強心針。
賀賢旗下「冰糖葫蘆」將初配雷神跑三班泥地1200米，這匹快馬近三次出爭泥地，均於較長之一哩衝不到尾，獲兩亞一季全上名而未勝，反映牠泥地出色但一哩略長。
今次唞足個多月，儲足新鮮感縮程跑泥地1200米，誠意十足，仲要搵到莫雷拉助拳，擺明全力出擊。
賀賢距16Win達標尚欠7場頭馬，救亡行動已屬刻不容緩，趁最近有馬贏轉勢，唔搏盡「冰糖葫蘆」勢係假。