盛產名人嘅皇仁書院，其舊生會上周五公佈新一屆名譽顧問，做得呢啲位，當然要有番咁上下名氣。曾經係前財爺曾俊華政治助理嘅羅永聰、ViuTV董事總經理魯庭暉、區域法院法官李慶年、中大校長段祟智、民政事務局體育專員楊德強、前助理廣播處長陳耀華、樹仁大學歷史學系客座副教授陳冠環共7人成為今屆新委任成員，佢哋同其餘18位續任嘅成員，任期兩年。
呢幾位old boys，有啲咩感受？法官李慶年話今次委任讓佢有機會向同學推廣公義教育，魯庭暉就話，皇仁係學習面對挫敗嘅最佳地方喎。
至於轉型做公關嘅羅永聰，佢就話會為同學提供建議同鼓勵，唔知有冇師弟會受佢啟發，以加入政府為目標？