上周六嘅澳職季後賽四強，墨爾本勝利憑安東尼斯喺最後關頭絕殺，協助球隊作客以3:2反勝FC悉尼，爆冷入決賽！常規賽冠軍悉尼喺24分鐘先開紀錄，右翼美亞斯祖斯基斬死球入禁區，勝利後衞史提芬尼格路擺老烏頂入自己龍門，悉尼領先1:0。但開心唔夠七分鐘，勝利就憑巴巴路西斯嘅妙射追平，比數維持1:1完半場。易邊後勝利反先，47分鐘由杜羅奧斯建功，比數改寫做2:1。惟戰至95分鐘，勝利中場安東尼斯喺最後關頭擺老烏，兩軍戰成2:2平手進行加時。安東尼斯之後罪人變功臣，佢喺117分鐘右路連過兩關殺人禁區射入，結果五個入球都由勝利球員入嘅情況下，客軍以3:2贏波，會喺周六決賽對紐卡素噴射機。