阿仙奴喺禮拜四歐霸盃四強首回合，主場迎戰馬德里體育會，作為領隊雲格最後一場歐戰主場，一開波積極搶攻，仲搞到馬體會右閘維沙積高10分鐘已經兩黃一紅離場，點知兵工廠人多打人少下，去到61分鐘先靠射手拿卡錫迪頭槌頂入領先一球。臨完場前八分鐘，馬體會前鋒基沙文仲把握到哥斯尼低級解圍失誤，佢竟然省到自己塊面而令個波反彈去球門方向，基沙文第一射雖被撲出，不過佢自己冷靜補中成1:1完場，馬體會就咁拎到重要嘅作客入球。
雲格對比數梗係失望，「我哋今晚已經可以晉級決賽，但錯失太多機會，仲俾對方射入作客入球，係最差嘅結果。」下禮拜四次回合去到萬達球場上演，馬體會主場各賽事已經11場冇失波，兵工廠晉級就凍過水喇。另一場四強，馬賽主場2:0力克薩爾斯堡，晉級機會高唱入雲。
