真正壯大的觀眾，應該絲毫不畏劇透，奈何世上脆弱的玻璃心向來佔大多數，而且層次絕對不高，就以《復仇者聯盟3》為例，雙手掩耳𠵱嘩鬼震的抗透者，一疊連聲尖叫「我唔要知我唔要知」，普遍懼怕的不外歹徒事先張揚片中各路英雄好漢最終邊個冇得留低，而不是擔心情節的柳暗花明遭提早揭發，影響沿途欣賞風景的興致。太自戀的他們都忘記了，塵歸塵土歸土這種宿命論，只適用於血肉之軀，由漫畫躍進銀幕的神話人物，其實並沒有大去的限制，遠的不說，隔籬台那個喜歡在公共電話亭換上緊身戰衣演肌肉的大隻佬，辰時卯時失去生命跡象，不是大鑼大鼓來一幕死過番生嗎，管轄這批蟻俠蜘蛛俠鐵甲奇俠的幕後大神，又豈無置生死於度外的胸襟和起死回生的魔法，就算劇情需要A君B君前仆後繼死畀你睇，扭轉陰陽有什麼困難，耶穌都話要過三天冷河先至復活升天，先進的遙控器可不設時間下限，只要隨手按一按，未寒的屍骨即刻龍精虎猛。憂天的杞人好做唔做為佢哋擔驚受怕，你話傻唔傻？
既然提起耶穌，請允許我兜遠路劇透少少：《無限之戰》其實是《創世紀》最黑色的變奏，不但亞伯拉罕式奉獻最愛考驗幻化為千里尋寶其中一關的鎖鑰，片中甚至出現類似上帝操勞了六天後印印腳唞一唞的畫面。再說下去你就要開殺戒了，錫身的我當然知機轉換話題：諾貝爾文學獎得主卜戴倫半站中途改信耶和華，滿腔熱情向同行傳教，缺乏慧根的鍾妮梅藻唔聽教不特止，還牙尖嘴利反唇相譏：「阿卜，你知唔知嗰本《聖經》，係你同我呢類詩人寫㗎？」