「你撞到我兩次呀！」「我真係有撞到你？」星期三凌晨街頭上演打擂台！凌晨兩點幾，讀者趙先生同朋友去元朗食消夜後，揸車途經鳳巢林立安寧路，見到兩個大男人街頭肉搏、拳拳到肉。
趙先生話，當時擂台戰已近尾聲，「瞓低嗰個俾人打到飛起，爆晒缸！」仲被對方騎喺身上破口大罵。
趙先生話佢聽街坊講，兩人肉搏原來同一樓一鳳有關！據說佢哋事發前一先一後欲光顧利群樓一間鳳樓，其中一人走時撞到等候者，因此嘈咗幾句，但越講越火爆，最終大打出手，由樓上打到落街。懷疑先郁手嘅男人節節敗退，被人打到瞓低，好彩兩個人都冇嚴重受傷。警方就回應話，周三凌晨約2時接報指有兩名男子喺安寧路毆鬥，警員趕至現場未發現可疑人，呼籲市民提供資料。