爆相爆片：
深水埗石壆現睡羅漢

香港人生活有幾忙，大家都明，但忙到隨街瞓就幾誇張。住喺深水埗嘅鄺小姐就遇到有人將馬路中間花圃當睡床周街瞓驚險場面。據佢喺前日下晝兩點影到嘅片段，「有個男人好似飲醉酒，成個人掛住係兩條馬路中間嘅花圃」。當時鄺小姐由御用「柴可夫」嘅丈夫駕車接載外出，「架車沿石硤尾街駛出長沙灣道，迎面見到有個男人瞓喺路中花圃，佢好定，好似飲醉酒，完全無反應」。

鄺小姐話，當時長沙灣道車來車往，好多巴士、貨車經過，但「睡羅漢」瞓得好冧，見佢一個轉身就跌出馬路被車撞，睇到佢心都驚一驚，不過當鄺小姐離開長沙灣道，就唔知睡羅漢最後咩下場。《蘋果》之後去返現場，已經唔見咗瞓覺男，連街坊同店舖都話冇見過。警方發言人就話，嗰日下午2時幾，並未收過有人在長沙灣道馬路中央花圃睡覺報告。