爆相爆片：
「新」iPhone7賣$4,000 　內地漢中伏

旺角先達廣場近日好紅：一星期前被海關掃場，日前港鐵手機冒煙事故女事主又話部機喺先達買，連子華黃牛飛都登陸先達，啱啱仲有單手機投訴關先達事。有位喺香港金融機構工作、初為人父嘅內地人金先生爆料，月中打算買部大容量嘅256GB iPhone7，但官網得128GB賣，原本對先達冇咩信心嘅佢喺朋友提議下去碰吓運氣。

金先生話佢本月13日喺先達一間店舖賣256GB嘅iPhone7，索價4,000元，較原裝機7,188元平近一半，佢當時都好疑惑，不過個店員話出咗iPhone 8及iPhone X，iPhone 7過晒氣同係倉底貨，因此劈價促銷。店員講到似層層，佢就買咗一部，開機又正常操作，駁電腦check機至發現係翻新機，立刻向店方質詢，對方亦願意退款。最終金生成功退款，但坦言「太失望，以為內地遍地假貨，沒想香港也這樣」。更直斥店舖缺德，以後不會到先達買手機。