上星期《犬之島》第一天公映立即捧場，韋斯安帝遜鐵粉的雀躍你一定可以理解，但本周《復仇者聯盟3》我也急急腳趁頭炷香熱鬧，則連自己都有點覺得撞邪──向來不是漫威迷，這十年的十八部不但睇啲唔睇啲，最可笑的是睇過哪幾部完全不記得，恩怨情仇一頭霧水，敵友不分生死罔顧，一不留神還把打對台的正義聯盟超級英雄入埋他們數，如果在戲院大堂需要經過考試驗明正身才能進場，恐怕無論如何不得其門而入。那麼，為什麼興致勃勃擠在平均年齡不超過十九歲、幾乎清一色板仔打扮的觀眾群中先睹為快？說出來失禮，演員名單裏那堆傾巢而出的麻甩佬太吸引了，領銜的雷神、美國隊長和鐵甲奇俠毋庸細表，連早就被踢到天不吐的畢利古柏和基斯柏德也回歸客串，羅漢疊羅漢一寸一寸都是活的，睾酮素之活躍血氣之旺盛前所未見，正所謂唔食豆腐火腩飯，聞下嗰陣攻鼻的男人味已經高潮迭起，試問來者不拒的嗜肉獸，有什麼辦法抵抗誘惑？
幸好看的是普通2D版，否則兩小時三十分猛男密集輪流上陣，張牙舞爪撲面而來，身子弱的阿伯唔頭暈都腳軟，散場一邊搽萬金油一邊扶住牆壁才能重返現實世界，你話幾咁尷尬。走馬燈一般快閃的千軍萬馬，故事還要話分幾頭，一時銀河守護隊大本營一時瓦干達原始森林，為追尋六粒無限寶石上窮碧落下黃泉，竟然善惡忠奸個個立體，編導的功力真不簡單。大戰幾百回合，傷亡在所難免（親愛的讀者，你睇我對你哋幾好，一個字也不劇透），哀鴻遍野仲有本事拍續集，直頭強過宇宙最強。