暑假就快到，唔少政黨都會開設暑期實習計劃，畀大專同學參加，身為民主派「中場」嘅民協都有搞。佢哋喺fb招募時，唔知係咪想搞爛gag？
學深入地區
將賣點之一放喺參與今次暑期實習計劃嘅同學，認識一眾「政壇元老」，咁相信「元老」中一定包括「政壇李克勤」、立法會前議員馮檢基啦。
民協強項向來係搞地區工作，如果想學點樣經營社區，去民協實習真係不錯選擇，尤其早前一場九西立法會補選，有啲市民真係非馮檢基唔投，呢次實習同學可以親身感受，馮檢基到底有乜特別個人魅力？
事實上呢個6至8月舉行嘅暑期實習計劃亦以「落區」為主題，希望畀參加者深入參與地區工作、負責行動策劃。招募對象包括修讀政治及公共行政、政策研究、社會工作、城市規劃或相關學系，或有意投身政治嘅同學，不限年級，據知會招募6至8人。有興趣嘅同學不妨到民協嘅fb了解詳情。
李八方