一班老友組成嘅每月晚飯飯局，食咗二十幾年，卒之食到除咗分析F之外，人人已過咗退休年齡，人人都冇咗公司私人秘書，於是年幾前再無秘書聯絡安排，飯局暫停咗近八九個月。卒之賓架W同財務L因為合資在灣仔開咗一間「顧問公司」，請咗一個秘書，於是由呢位秘書小姐一個人負責晒聯絡工作，飯局重開。其實佢兩位都唔做生意嘅，根本唔出街搵客，只係想有個辦公室在市區出入，方便應酬而已，實際上，佢兩位專做無糧義工及公司獨立非執董，都需要秘書幫手跟進一啲文書工作及睇回覆email嘅。分析F就自動放棄咗極高薪職位，埋首於不少有辛苦冇糧出嘅公職，賓架S仲成為無糧公職王，我地笑佢攞苦嚟辛，因為佢因公開會，可以連開18小時，去廁所都試過畀人批評話係「鬆散」，死未！有時覺得，香港今天仍然能夠運行如常，與呢類人（分析F，賓架S之流）肯犧牲個人時間，服務社會，不無關係。好似左丁山咁，生性疏懶，有空閒時間就情願到馬會馬場，其他事情唔好搞。
上星期輪到左丁山做東，本想訂陸羽吃晚飯，點知賓架W來電郵話，耀華街一間小店漁一在四月二十五日結束營業，叫我地去漁一聚會，於是以佢熟客面子，搵到一張枱，去同漁一老闆講拜拜。漁一樓上店並不大，好易爆棚，平時生意非常好，賓架W對漁一結業，甚為不捨，問老闆：「係唔係加租太勁呀？」老闆話：「加租到50元一呎，係難頂啲嘅，但最慘係請唔到人，大家做到索氣，洗碗工都要萬八蚊一個月，其他你識計嘅啦。 中華廚藝學院畢業嘅年青廚師，個個鍾意做西餐，簡單易做吖嘛，入酒樓學習炒煮蒸燜燉炸煎，幾百樣廣東菜，複雜到死，邊度有耐性吖。廣東菜飯店，都幾難招聘或者留住新廚師，我地大廚都係股東，做到踢腳，大家同意之下，咪結束營業咯！」原來如此，老闆話日常皮費，當然以食材、租金、工資為三座大山，人工佔比例最高，有三成幾，租金大約係總皮費之15%。呢個比例係呢個行業嘅基準，每間食肆不會相差太遠。聽完老闆講，就可以知道香港地道粵菜飯店，前景堪虞，年青顧客鍾意西餐，年青廚師鍾意做西廚，再加上勞工短缺，逐漸冇得玩嘞。