教育局堅持今年復考小三TSA，本來話全港抽10%學生考，結果留咗條尾巴，容許學校自選全級考，畀教育團體同家長鬧爆。為咗平息家長對復考疑慮，教育局最近連環推出多條表揚TSA嘅宣傳短片，拍呢幾條短片加埋喺fb宣傳，就用咗15,000蚊公帑，有網民就話與其浪費公帑硬銷TSA，不如用嚟全民派錢都冇咁嬲呀﹗
教育局推出嘅短片條條都吹捧TSA，其中一條片模擬學校舉行教師會議，飾演教師嘅演員問校長，既然校內已經有考試，點解仲要有TSA呀？阿「校長」就回應話，全港性TSA可以「全面反映學生水平」，如果知道學生未掌握某啲科、某啲內容，學校咪可以即時補救囉，講到TSA仲緊要過校內考試咁款。有網民睇完短片就眼火爆，話既然TSA咁正，學校理應全面取消校內試啦！