土地問題嚴重，要租到個好地方都唔易，威爾斯親王醫院曾經有過「筍盤」，講緊嘅係昔日職員宿舍，E座2,000呎單位月租大約3萬蚊，比同區屋苑單位平一大截。宿舍大樓由1997年開始交產業署放租，市民都租得。八方噚日參觀過頂層單位，相當寬敞，仲有超大露台。但醫院今年開始第二期第一階段重建，其中四幢宿舍大樓要拆卸，改建成住院新翼大樓，耗資300億元，加450張病床同16間手術室，將於2027年落成。
大樓拆卸前，其實仲有最後任務，就係畀警察新界南衝鋒隊隊員練習爆門，一道道爛晒嘅木門就係訓練痕迹，有啲仲踢到成道門飛出嚟，剩番門框。新界東聯網行政總監羅思偉話，反正要拆，不如畀警方練習，物盡其用喎。
威院總共有五幢職員宿舍，嚟緊只會留番B座，繼續畀候命醫生休息。而連接宿舍同威院嘅地下秘道亦因工程而消失，八方噚日探訪下呢條秘道，原來係落雨嘅時候唔少醫護都會行，唔使濕身嘛。