周一晚大約11點，港鐵列車內有iPhone冒煙，700個乘客要喺油麻地站緊急疏散，讀者鄭先生當時喺現場，並且第一時間拍低事發經過（圖），佢話當時有人大叫：「落車呀，有人縱火呀！」其他人爭相走避，情況混亂。事隔一日，《蘋果》搵到22歲手機機主傅小姐，佢話當晚手持嘅iPhone7 plus係舊年9月喺旺角先達買，店員同佢講係新機，但係用咗7個月就經常自動熄機，原本打算去檢查維修，點知未去整就出事。
事後冇攞走殘骸
傅小姐當時同兩個閨蜜由尖沙嘴搭港鐵去旺角，手上部iPhone突然好㷫同冒煙，驚到即刻丟落地下，車上乘客以為又有人喺港鐵縱火，爭相走避，嗰部燒到焦黑嘅iPhone，事後就由港鐵職員執走。
其實海關早幾日喺先達廣場、深水埗及銅鑼灣嘅手機舖撿獲大批冒牌手機配件，或者以正貨半價價錢出售嘅裝嵌手機，唔知傅小姐係唔係咁樣中招呢？我哋都問過先達老行尊，估計出事手機係電池有問題，不過傅小姐話已經唔記得部機買幾錢，事後無攞走部機殘骸，亦唔打算追究，人無事就好，佢話會買過部新機，真係豁達。