社交平台宣傳活動好受歡迎，但一唔小心好易變「關公災難」！話說新世界New World Club早前透過fb同電郵搞推廣活動，叫會員po吓理想嘅智能家居係點，最精采嘅有機會獲贈《復仇者聯盟3：無限之戰》噚日首映戲票兩張。有讀者報料畀《蘋果》，話前晚大批參加者好開心咁收到確認信指中獎，點知開心咗一晚，瞓醒卻驚覺係一場歡喜一場空。
稱外判公司程序出錯
因為新世界昨晨突然再發電郵畀呢批「得獎者」，澄清佢哋冇中獎，只係系統錯誤而收到得獎電郵，一時間「得獎者」群情洶湧，自組「復仇者聯盟」喺New World Club fb留言炮轟新世界。有「得獎者」嬲嬲豬話，不滿約好朋友先至嚟話冇飛睇戲；亦有人留言：「20年前出呢啲錯誤都有人信，今日我覺得真係冇可能！」
「得獎者」莫先生質疑唔係簡單嘅係統錯誤，因為佢收到嘅「錯誤」得獎電郵，有埋佢個名同入場QR Code，佢認為New World Club應該公開得獎名單以正視聽，他又關注噚晚首映會否有真、假得獎者一齊現身用同一個QR Code爭入場，若果係咁恐怕會好混亂，「應該有花生食」。
記者稍後打畀New World Club熱線，有男職員Say Sorry承認系統出錯。New World Club發言人則回應指，指就今次事件造成不便深感抱歉，已即時作出跟進，並將於7天內向所有受影響的會員送出The Grand Cinema電影禮券（每張價值135元，禮券數目為會員本人及所登記之同行人數）。由於事件涉及外聘公司發出電郵的程序有誤，New World Club會認真檢討相關流程，避免同類事件再次發生。