立法會3.11補選塵埃落定，候選人陸續向選舉事務處提交選舉開支申報，除咗正式入閘嘅候選人，就連有傳會參選嘅人士都獲處方「邀請」遞交申報，喺民主派初選落敗，之後放棄做Plan B而無報名嘅民協馮檢基，都申報咗逾29萬選舉開支，係同區獨立候選人蔡東洲嘅12倍，咁大手筆，可見阿基爭入閘嘅雄心壯志。
6萬蚊sell條片
根據申報，阿基最大一筆開支用喺選舉聚會，共涉款10.8萬，當中主要用喺民主動力舉行嘅民主派初選，包括委託港大進行民意調查同埋舉行實體投票等；另一筆超過10萬元嘅開支就用作招聘選舉助理等，助理工作有開街站同打電話催票。
選舉廣告方面，阿基用咗6萬幾蚊，有萬幾蚊喺拍片同賣廣告，相信大家對「政壇李克勤」條片，記憶猶新。而喺民主派初選嘅實體投票佢獲得2,036票，唔知佢覺得呢29萬使得值唔值？
至於用咗2.3萬嘅蔡東洲，分別以1.6萬印咗100張橫額，其餘近7,000蚊開支亦都同橫額有關，因為佢選舉後無按法例拆走橫額，要向食環署繳交罰款！
選舉開支（部份）
選舉聚會：10.8萬
招聘選舉職員：10萬
廣 告：6.4萬
資料來源：選舉事務處文件
李八方