禮拜一晚英超獨腳戲，愛華頓憑英格蘭翼鋒禾確特一箭定江山，喺主場以1:0小勝近況甚勇嘅紐卡素。比賽前上演感人一幕，拖肥隊長菲臘積基爾卡雙手捧住一個小型機械人入場，令一名身體機能出現多種毛病嘅14歲病童Jack McLinden，得以成為球壇史上首位遙距球僮。報道話，嗰個機械人可以將現場環境實況以全景（360度）嘅方式即時傳送畀Jack嘅平板電腦，令佢猶如置身球場。
禾仔射垮紐卡素
比賽唯一入球喺下半場六分鐘出現，恩歷克波拿斯右路大腳傳中，皮球直飛遠柱位置禾確特嘅方向。儘管呢名前阿仙奴翼鋒第一次嘗試控球嗰時出現失誤，皮球彈離腳下，但又之後又彈中紐卡素守將耶迪連嘅腳，重回禾確特腳下。今次禾仔未有失機，佢喺混亂之中搵到射門機會，之後大腳抽射破網，助愛華頓成為最後贏家。
