歐洲五大聯賽到呢一刻唔係已經提早決出冠軍，就係榜首大幅拋離穩贏，惟獨意甲例外，踢完周日榜首大戰之後，爭標形勢更加緊湊。作客嘅次席球隊拿玻里靠中堅高列巴尼臨完場前頭槌建功，1:0絕殺祖雲達斯，追到只落後祖記一分，仲有四輪聯賽之下，隨時要鬥到最後先知邊個冠軍。
高列巴尼一槌定音
主場嘅祖記開波11分鐘就有壞消息，中堅基亞連尼受傷退下火線，檢查後更可能要提早收咧。而就比賽形勢嚟講，拿玻里係比較主動嘅一隊，全場有12次射門，控球率亦高達60%，相反主隊就踢得好保守，全場竟然只得一腳中門框嘅射門。結果拿玻里全場佔優下，臨完場前終於有回報，中堅高列巴尼接應荷西卡利祖開出角球，一頭頂破祖記意甲20場不敗走勢。
贏出呢場天王山之戰後，拿玻里凌晨時份返到那不勒斯機場，有幾千名球迷專登到機場接機，一眾球員受到球迷英雄式歡迎。今仗立下大功嘅高列巴尼就表示見到呢個畫面好興奮，「呢幾日成個那不勒斯都期待呢場波，球迷們一直非常支持我哋，而我哋能夠做嘅就係用贏波報答佢哋。」而祖記教練艾基利喺賽後都大讚拿玻里表現，「拿玻里嘅控球同迫搶都做得好，我哋嘅反擊唔夠銳利，結果最後階段輸波，佢哋係更值得贏波嘅一方。」
祖記得番一分優勢
拿玻里全取三分後，已經追到差祖雲達斯一分。雖然祖記喺得失球上領先拿玻里，但餘下四場聯賽仲要作客宿敵國際米蘭同羅馬兩支爭入前四嘅球隊，相反拿玻里比較難踢嘅就只有費倫天拿同森多利亞。難怪唔少評論都睇好拿玻里可以自89/90球季，馬勒當拿時代後再次捧起意甲獎盃。
另外，今周嘅意甲有唔少教練同球員塊面都有一撻紅色顏料，原來係響應保障女性身體運動，喺面上畫嘅紅色顏料，意思係向對女性使用暴力出紅牌。