周日上演餘下一場英足盃四強戰，車路士憑基奧特同艾華路莫拉達各建一功，喺溫布萊球場以2:0擊退「聖人」修咸頓殺入決賽，會同宿敵曼聯爭冠軍。雖然雙方曾爆發罵戰，但車仔領隊干地直言，與紅魔領隊摩連奴已和好如初，「我哋之間冇任何問題」。
自知防守漏洞多，「聖人」今仗派三防中勒美拿、奧里奧爾羅美奧同賀積查治上陣，果然喺上半場守到藍戰士一戙都冇，法比加斯同夏薩特都表現麻麻，兩隊半場冇交收。趁「聖人」未站穩陣腳，車路士下半場一開始先開紀錄，基奧特喺46分鐘殺入禁區，之後猶如美斯上身左扭右扭連過幾關射入，搞到「聖人」成條防線一仆一碌，認真犀利！「聖人」之後其實有追平嘅機會，但沙恩朗單刀竟然射斜，給予藍戰士喘息機會。戰至82分鐘，艾斯派古達後場作出招牌高波傳送，莫拉達發揮空中霸王本色一頂入網，鎖定勝局，協助球隊殺入決賽。
