提早奪得今季英超冠軍嘅曼城周日主場迎戰護級球隊史雲斯，雖然屬「例行公事」，但藍月一啲都冇手軟，以一場大勝慶祝，場波一完幾乎全部主場球迷都湧晒落球場，普天同慶。曼城12分鐘就由大衛施華接應史達寧傳送窄位射入先開紀錄；四分鐘後史達寧接應戴爾夫傳中近門掃入，曼城半場領先2:0。
換邊後藍月繼續搶攻，奇雲迪布尼54分鐘遠射得手，63分鐘史達寧單人匹馬爆入禁區，被史雲斯中堅費達歷高費南迪斯鏟跌，加比爾捷西斯主射12碼中柱，幸好貝拿度施華及時殺上補中；88分鐘加比爾捷西斯再接應耶耶托尼傳送近門頂成5:0完場。
完場後，一班曼城球迷仲衝晒落場同班球員一齊慶祝，塞到成個草地滿晒，搞到當地電視台做賽後訪問都要移師陣地去球員通道入面，場面非常墟冚。