HBO出品嘅《西部世界》(Westworld)之所以被封為神劇，其中係因為劇中呈現嘅世界觀非常龐大，在主線外每條支線都緊扣主題一路推演，以至於講到人類及機械人追尋起源，同自我價值嘅過程，到後來觀眾先發現，每條支線最後都殊途同歸。
講番第二季首集，片長一小時十五分，上季結局觀眾可能覺得謎團已逐一解開，但喺新一季內，編劇原來帶畀大家更加多新嘅謎團，以下就係新一季帶畀觀眾嘅全新伏線。（以下內容包含第一集劇透，唔想睇嘅儘快逃生！）
.
.
.
.
.
.
.
.
.
.
.
.
.
.
.
.
.
.
.
首先喺第一集戲份較多，謝菲胡禮（Jeffrey Wright）飾演嘅嘅機械人Bernard，佢同泰莎湯遜（Tessa Thompson）飾演嘅Charlotte去到地下室避難時，Charlotte喺談話中透露樂園嘅母公司Delos同時擁有其他類似嘅Westworld樂園，而且Delos喺知道機械人叛變後遲遲不肯派救兵，反過來仲堅持要Charlotte先搵到一位喺樂園中嘅男機械人送回Delos，究竟當中隱藏咗幾多秘密？
其次就係黑衣人艾哈里斯（Ed Harris）飾演嘅William，佢喺大難不死後重返樂園時， 竟然遇上喺上一季曾經出現嘅Robert Ford少年版機械人化身，仲表示屬於William嘅遊戲現在開始， 而今次遊戲嘅目的就係找尋出口。
至於早前喺劇集預告片中曾出現嘅日本藝妓及日本武士場景，喺第一集就仲未出現。另外，肯定嘅係上集結局被槍殺，安東尼鶴健士（Anthony Hopkins）飾演嘅Robert Ford，於今集中被鏡頭清晰交代佢嘅屍體，相信佢喺餘下集數再出現嘅機會微乎其微，然而，第二季《西部世界》嘅追看性依然相當濃烈，相信觀眾們又要開始一星期一集嘅追劇生涯。
《西部世界》(Westworld)第二季，逢周一早上9時HBO（Now TV 頻道110/115）與美國同步播出，同晚10時重溫，或播出後於HBO自選服務、Now隨身睇及HBO GO足本重溫。