上周六西班牙盃決賽，巴塞喺中立場5:0血洗西維爾連贏四屆冠軍，33歲嘅老隊長恩尼斯達今場有入一球，而且佢完場前被換出仲做晒告別工夫，睇嚟小白今場好大機會係最後一次喺盃賽為巴塞上陣，而佢個人職業生涯累積贏到34項錦標。
今場喺馬德里體育會嘅萬達球場上演，巴塞14分鐘就由菲臘比古天奴右路近底線位置傳中，蘇亞雷斯喺門前射入空門。17分鐘後，佐迪艾巴喺左邊近底線位，後腳傳畀美斯，美斯就喺小禁區前大腳抽射破網。40分鐘美斯直線交畀阿蘇，趁守門員出迎前射入，完半場巴塞贏到三球。
貢獻一球炒西維爾五蛋
52分鐘美斯助攻畀小白推過門將後窄位射入，69分鐘巴塞博得12碼，由古天奴埋齋，巴塞大勝5:0，連續四季贏得西班牙盃。今次都係巴塞歷來第30次贏西盃，名副其實係呢項盃賽之王。
今次捧盃對恩尼斯達嚟講好有意義，因為佢預計季後約滿離隊，據報會去中超踢重慶力帆，完場前兩分鐘佢俾教練華維迪調離場，巴塞同敵對嘅西維爾球迷都對小白報以熱烈嘅掌聲，為呢位中場大師級人馬送行。小白行返去後備席時，都俾鏡頭捕捉到佢眼泛淚光。小白就話呢個禮拜會公佈去向：「我𠵱家非常激動，畢竟踢咗巴塞咁多年。呢個禮拜我會向公眾表明決定，大家一直以來對我嘅支持係無價嘅。」
傳登陸重慶搵「人仔」
小白出身巴塞拉馬西亞青訓營，2002年升上一隊踢到𠵱家，佢嘅球會同國家隊生涯至今已經贏咗34項錦標，包括八次西甲、六次西盃、七次西班牙超級盃、四次歐聯、三次世冠盃、三次歐超盃、兩次歐國盃同埋一次世盃，成就極高。下個月就34歲嘅小白，雖然同巴塞簽過終身合約，不過合約條款都有指佢想走的話可以離隊。
西班牙《馬卡報》報道，恩尼斯達嘅律師同經理人上星期已經同一間中超球會達成協議，好大機會係重慶力帆，而唔係之前傳開嘅天津權健。由於雙方有保密協議，所以最後都係要等小白公佈。
