Marvel巨作《復仇者聯盟3：無限之戰》（Avengers：Infinity War）雖然仲有3日先上映，但其實各種消息新聞都已經滿天飛，而以下7大fun facts，都算係睇戲之前嘅須知，當係預測劇情又好，得啖笑又好，總之睇下無壞，唔睇就蝕晒喇。
1.佐斯布連今期惡晒
男星佐斯布連（Josh Brolin）可謂「今期惡晒」。事關佢於《復仇者3》中飾演奸角魁隆，但同時又於5月中上映嘅《死侍2》（Deadpool）中飾演奸角機堡。同一月份，於Marvel世界兩部電影中，同時演兩個最大奸角。
2.魁隆變紅亦得 變藍亦得
魁隆於《銀河守護隊》（Guardians of the Galaxy）中出現過，當時明明成個身都係藍色，但今次《復仇者3》預告中所見，卻變成粉紅色。雖然有網民笑指佢用咗「嫩紅素」搞到變成嬌嫩粉紅色，不過似乎佢係識變色，亦係故事關鍵之一。
3.說好的Captain Marvel？
據指由金像影后貝兒娜森（Brie Larson）飾演嘅新角Captain Marvel會成為關鍵人物，但佢今集唔會出現，將會與下年上映嘅第二部先會出場。
4.隊伍大兜亂
英雄們於第一部及第二部《復仇者3》中，都會組成截然不同嘅隊伍，即係話今集Iron man同奇異博士組隊，下次又未必一樣。全片就共有67個角色登場。
5.雷神都唔識！？
「雷神」基斯咸斯禾夫（Chris Hemsworth）早前受訪時，指戲中有連佢都唔知唔認識嘅神秘角色：「我唔知嗰個係邊個，但佢得到很大嘅掌聲。」令觀眾更期待。
6.劇本懶神秘
《復仇者3》嘅上下半部雖然分開兩年上映，但卻係一次過拍攝嘅。而為保持神秘，演員們於開拍前2星期都係未收到劇本，原因係電影公司想保密劇情。不過就有演員暗暗不滿，因為遲到連角色都預備唔切！
7.手套成雙成對
相傳除咗魁隆手上的嗰一隻無限手套，仲有另外一隻，仲好可能會係英雄們嘅戰勝關鍵。