在路上揸車，唔好彩碰到警車追可疑車輛，疑犯車高速逃走，警車全力追趕，無辜司機點算？肥仔K未夠20歲時，在加州坐朋友老爺車就遇到呢類場面，當時肥仔K嘅朋友司機亦只係二十歲，經驗不足，聽見警車警鐘大鳴從後而至，為之手震，卒之在前面撞壆，好彩兩人冇受傷啫。
月前香港亦有此情況，場面更混亂，既有警車追疑犯車，亦有交通警在前面示意前列汽車慢駛，意圖製造路障，迫使賊車慢駛，但疑犯車嘅瘋狂司機癲起上嚟，並無減速，於是撞車，車撞車，連環撞車導致二死五傷。一名無辜司機因此腦出血入院，但竟然還要照例收到警方之「擬控告通知書」，司機點會唔嬲到近乎爆血管！肥仔K在加州撞車之事，記憶猶新，對香港發生同類、更驚人事件，當然為無辜司機不值。想唔到富豪董事長在街上碰到左丁山，亦大罵警方處理不當，佢話：「其實發生事後，警務處長應該寫信去慰問無辜司機，先至係路，又有乜理由一本通書睇到老，按所謂既定程序，向司機發出擬檢控通知書呀？我知道最後多數唔會告司機嘅，但接信人收到咁嘅信，唔撞火就有鬼。」董事長平時好好脾氣，和藹可親，又時時擁護政府施政，屬於溫和老實建制派，有如此為普通市民憤憤不平之氣，幾有一個decent gentleman嘅氣質。
左丁山相信此事，除非警察麻木不仁，有權盡使，否則好快便會解決，警務處長應該去醫院慰問傷者，順便講句：「事情純屬不幸，警方對此感到遺憾及抱歉」，市民必定條氣順番一啲，否則嘅話，警方就似是無血機械人，麻木不仁，更為特區政府添煩添亂，傷盡交通警察形象。
但是有位老友在中午飯局講：「我留意到現時啲高官漸漸講說話變成錄音帶，猛咁背預定台詞，日趨機械化，常識邏輯欠奉喎，做事日漸僵化，警察或已經受到影響！」娶內地人為太太嘅朋友C就講：「現在嘅中聯辦主任王志民比張曉明左得多，日日長篇大論鬧港獨，講國安，鼓吹23條立法，意圖製造一個由上帶動（Top Down）嘅氣勢，然後大把建制派人士加入合唱，自說自話，跟住由兩張愛國報紙大講全城憤慨，市民不滿，實在有損香港和諧！」建制派內已不容有異議，中聯辦一定調，政府官默默跟隨，「社團」、「各界」高呼口號表態，令人聯想到1967，漸漸無人敢出聲了。